يوم تاريخى لواحد أول مرة يمشى للرياضية !!

هذه مقالة كتبها قديما بالتحديد سنة 2003 افرنجي ، احد اعز اصدقائي "حسام ابوزيد" ليس الهلالي ، وحبيت ان تشاركوني قرائتها .

فى اول يوم نمشى فيه للرياضية :-

يا سادة يا كرام هادى قصة واحد اول مرة يمشى فى حياته للرياضية ... القصة و ما فيها ان فى واحد و طبعاً كلكم عارفيه "ويسووو " منو غيره اللى راضع حليب الاتحاد من قبل ما يرضع حليب حتى امه و مستعد يبيع بوه على خاطر يشرى شال للاتحاد بزوز جنى "بصارة يا ويسووو "

الواحد هذا يا سادة من اعز اصدقائى صادف انى تلاقيت انى واياه ع الماسنجر قبل ما تندلع الحرب بين الاتحاد و النصر على كأس الدورى .... فقتله شنو يا راس فى مباراة اليوم قالى ايه فيه قتله باهى كيف الراى نبى نمشى الرياضية .... قالى باهى هات 3 و نص و تعالى الساعة اربعة للحوش نمشوا مع بعضنا .

بالفعل ما كذبتش خبر و طرت للعمك ويسو فى شارع النصر و خديت تاكسى من الدريبى الى المدينة و من المدينة الى الفرناج و نزلت عند قصر الشعب و طلعت زى الصاروخ لعند ها الويسوو قلت توا تلاقى حمى الاتحاد مأثرة فيه و بيطلع بكرى بكرى .

جيناه العلج هذا لقيناه مش موتى روحه و قعدنا نتغوتوله على طاسة امية باش مشى جابها يعلم الله بالحال قريب طلبنا تدخل من الامم المتحدة باش جابها و بعدين قبل ما نطلعوا مشى ركب يجيب فى الكاميرا المعفنة متاعه قعد سنة باش جابها لدرجة انى نحسابه غر بيجيب معاه فريق تصوير و المخرج بطاطا أنزوز "و الله ناسى اسمه " .

المهم جو الشباب و طلعنا فى سيارة وليد من اصحابه مدمنى الاتحاد و مشينا للرياضية بسرعة صاروخ ارض جو بيهبط فى تريبونه الاتحاد .

المهم وصلنا غادى و قطعنا البوليط اللى طلعوا ب 2 دينار مش ب 3 و نص " شكله كان بيدير فيا بزنس "

بعدها مشينا للعبيط اللى يقطع فى البواليط شكله واحد عنده عقدة نفسية و الا هارب من مراته جايبينه يفش فى غله فى تشريك البواليط .......... بعدها جينا لعمك الكاشف عن اسلحة الدمار الشامل و ما لقى عندنا شى خاطى السبته بدت تزوى .

و بعدين تلقونا جماعة الامن اللى فتشونا شبه تفتيش شخصى و طاحوا فيا *************** زابطين بعضنا يا وسام شنو صار فى هذاك اليوم ههههههههههههه .

ما علينا .... المهم احتلينا مراكزنا فى تريبونه الاتحاد الدور الثانى الصف الاول و يا ريتنا ما خدينا الصف الاول !! و قعدت الشمس تاكل فينا ساعتين من زمان .

و بالفعل الساعة 6 بالضبط بدت الغزوة ما بين فريق الاتحاد و النصر و طبعاً بما انى كنت فى تريبونه الاتحاد كان ضرورى نشجع الاتحاد بالاضافة الى ان قروبى كلهم تيحة .

و بدل ما نراقب المباراة انشغل بالجمهور و الشعارات اللى يقولوا فيها و الله ضحكت لين عييت بالذات منين خطمت مساعدة المدرب الايطالى على ما اعتقد قعدا الجماعة يغنوا "و الاتحاد سياد الكورة ... هيا تعالى يا سنفورة "


و طبعاً بعد ما بدت المباراة صار فيا الشتم بين تريبونه الاتحاد و النصر "اللى كان من بينهم فرقة من الاهلى " .
و تبادلوا فيها سيل من الشتائم و السبان اللى يصم الآدان غر اضحك بس .

طبعاً انى ما شاركتش فى المهزلة متاع السبان و الهزايب لان اللى فى الطرف الثانى ليبيى زينى زيه و كلنا ولاد ليبيا و مش معقوله لان شخص يشجع فى فريق غير اللى نشجع فيه نبد ا نسب فيه و نلعن و مش عارف شنو و نطلع فى شعارات و معندهمش قلب و كلاب " حاشاكم و مش عارف شنو " و غيرها و غيرها .

لو بس اللى واقف يلعن و يسب و يشتم هذا يحط فى باله ان اللى فى الطرف الثانى ولد بلاده انى متاكد انه راح يتراجع على الكلام اللى يقول فيه لكن الله غالب .

طبعاً عاد ما نحكيلكش ع الحكم متاع المباراة ما خلو شنو قالوله مشجعى الاتحاد لانه ظلم الفريق هلبة و الله مسكين من كثر ما قالوله يا ولد **** لين قريب يصدق و يروح يسأل امه يوقلها "يوما انى ولد شكون " .

عاد ما نحلكش على مساعد الحكم كلى على راسه لين شبع و هوا كل ما يطلع يقولوله خش يا **** "حدفت رقابياً " .
و طبعاً مدرب الاتحاد كان ليه نصيب الاسد من الشتائم و هزايب الجمهور .

و انى طبعاً بحكم تقعمزيتى الغلط فى الصف الاول من الدور الثانى فى التريبونة كليت نصيب التنين من الخط و لوح و شيش الميةو حكك المشروب و الدفالات و الرياقات من اللتالى .... و الله صارت حالتى صعبة للمليون .

طبعاً بعد ما صار اللى صار فى المباراة فى الشوط الاول و خسارة الاتحاد ب 2 لصفر قعدت نضحك قدام الشباب و جوى مليح من النفخ اللى صاير فى التريبونه لدرجة ان واحد من جمهور الاتحاد شك فى انى عميل لفريق النصر و قالى شورا على قلبك زى العشل تضحك و جوك مليح "ميحسابش هذا جوى من الاساس الراجل " لكن بارك الله فيهم الشباب فهموه الشباب على انى جديد ع الرياضية و قاعدين يرضعوا فيا فى حليب الاتحاد و الا كان هذا راهو استاكوا فيا الجمهور و كليت طريحة مكلاهاش حرامى شباشب صبع فى جامع .

طبعاً بعد العودة للشوط الثانى و تمكن الاتحاد من تقليص الفارق و من ثم معادلة النتيجة الى 2-2 الجمهور متاع الاتحاد بدى يغلى غليان ع الجول متاع الفوز لدرجة انهم ولوا حتى على فريقهم و بدوا يسبوا فيه ........... هههههههههههههه دير هكى يا حمار لا يا كلب تو وين يرفس القرد هذا و خودلك عاد !!!

المصيبة انى شبحت ولد صغير دار حراكات وسب سبان عند الله العلم و المصيبة انه يقرا فى صف اول او حتى المدرسة مازال ما خشهاش و المصيبة الاكبر ان بوه فوق منه و حتى هوا احرف ........... و الله الا حالة و بعدين يقولك ولدى من وين جابه الكلام اللى يقول فيه ؟؟!!

طبعاً عاد ما نحكيلكش شنو يصير لما تجى فرصة لتسجيل قول و الا حاجة للاتحاد الجماعة قريب تهبل قريب تنزل هيا اللى تلعب بدل من الفريق بالذات ويسوووو من كثر القفزات الجبارة اللى دارها بعد كل مرة تتوفر فرصة للتهديف لدرجة انى توعت تنهار التريبونة على اللى فيها !!

الجمهور كان كله متفاعل متحمس متشوق للجول ........ حارق اعصابه على ما هناك شى الا انى الوحيد جاى غر باش نضحك و نغير جو بدل من النفخ متاع النت 24 ساعة و هذا المزبوط !! علاش الواحد يحرق فى اعصابه على شقفة جووول يع يع يع .

طبعاً بعد ما انهت المباراة بالتعادل صار فيها التراشق بالعبوات الناسفة من قبل الجمهور و الغازات المسيلة للدموع من قبل جماعة ال Support " واحد يكبر فى الموضوع "


اللى نتدكره ان الشرفيه او تسليم الكاس كان راح يتم تحت تريبونه الاتحاد و لكن سمعت ابو سفيان يصيح لا تدعوهم ياخدوا الكاس من تحت التريبونة و هب الجمهور هبة واحدة يرشقون كل من يقترب من التريبونه .


انى طبعاً قعدت واقف نتفرج مندير فى شى لكن لما شفت رئيس الامن شد جهاز الارسال و قعد يتكلم بيه شكيت ان فى عملية تفريق للجمهور راح تصير و لكن انى شاكك فى انه اتصل بعياله فى الحوش يقوللها قداش تبوا فردة خبزة قبل ما نروح ...... هههههههههههههه

لكن انى رجحت الاحتمال الاول و بالفعل لقيت ان الجمهور فى الدور الاول طالع يجرى زى الصاروخ طبعاً انى ما كذبتش خبر ركبت 4 تيربو و طلعت زى الصاروخ و انقز فى الدرج و نخترق فى الحواجز و نقفز من فوق الجدران و اخر قفزة كانت خارج سور الرياضية ...... قلت الحمد لله وصلنا الى بر الامان .

و صارلنا عاد التشحوير باش روحت و خديت تاكسى تروح بيا و من هذا كا اليوم حالف ما عاد نمشى فيا للرياضية .

انى بس تعقيبى ع المباراة حاجتين .

1- كل جمهور يشتم فى جمهور الفريق الثانى مع انى احنى اولاد بلاد واحدة و المفروض الكلام اللى نديروا فيه هذا نبطلوه و نحترم بعضنا و نشجعوا فريقنا مش نسبوا بعضنا .

2- ان لما الفريق متاعك يخسر تقبل الخسارة بروح رياضية مش تقول لا و كيف و تبدا تحدف !!

هناك تعليق واحد :

  1. حرام والله المفروض ما مشيت تمرمدت وروحت

    ردحذف

بسم الله الرحمن الرحيم ( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )