10 نصائح لكي تجري البنات في جرتك


أولا :
البنت بتحب الولد الثقيل خلي روحك ديما بارد معاها وبايخ كان فيها كيف وكان ماتعرفش تسوق عليها البرادة متعك طلع رخصة برادة دم او رخصة نفخ ان امكن

ثانيا :
البنت بتحب الولد الفلوس ...اسرق ...اخنب...انهب ...دير أي حاجة بش تولي فلوس...لازم تكون الفلوس هلبة لاترضى بالقليل ...مايهمش الفلوس حلال ولا حرام...بل يستحب ان تكون حرام بس تحس البنت انك كريم عبدالعزيز في فيلم حرامية في تايلند ...ماعندكش فلوس...وفشلت في الحصول على فلوس يافاشل...ياأفشل الفاشلين استهبل ..ارسم عليها انك غني والفلوس من غير حساب عندك...ارسم عليها واشتغلها رسام..يعني انت لاقي شغل يافاشل...اشتغل عليها وارسم انك غني لي امتي بنقعد نعلم فيك يافاشل .

ثالثا :
البنت اتحب الولد اللي ماتفهماش...خليك متخلف في اسلوبك وطريقة تعاملك معها خليك اهبل في كلامك معها وماتعطيهاش لاحق ولاباطل...مانبيهاش تفهم منك اي جملة مفيدة تطلع من فمك....وكان غلطت وقلت جملة مفيدة ارجع في كلامك ولخبط نبيها تهبل وماتفهمش حاجة .

رابعا :
البنت تحب الولد الكذاب ...افتح عليها حكاك الكذب كلها...احكيليها عن رحلاتك في المريخ وعن غزواتك وفتوحاتك وكلمها واحكيلها عن اختراعك للبنسلين وعن قدرتك على الطيران و قراية افكار الناس..وقللها انك تعرف كل حاجة في الدنيا وتعرف هي وين تمشي ومع من تطلع و وين تهيج .

خامسا :
البنت تحب الولد الحبوب المحبوب ...دلع وخفف نفسك وخليك فريش طول اليوم ...وشدها في جرة الناس وضيقلهم خلقهم...وبصر معاها طول الوقت بداعي ومن غير داعي...تلقاها لابسة فستان جديد صب عليه ماية وقوللها بصارة خليها تحس ان كل الناس تتمنى انك تبصر معاهم .

سادسا :
البنت بتحب الولد اللي مش راجل...خليك ناعم عال الاخر وبسكوت و حساس موت على الخالص وخليك ياي ياي خليك اكثر من عسول...اسالني انا البنات تموت في هذا الصنف .

سابعا :
البنت تحب الولد اللي يفهمها انهاحلوة بل فهمها انها احلى بنت في البلاد...لالالالا اصبر البلاد شوية بل الكون احسن...اوصفلها جمالها وقوللها قداش هي فاتنة وحلاوتها مذوباتك ومسهراتك ياعين وهي بس حلوة والوحيدة لي عينك تشبح فيها....لان البنت لازم تحس انها الاحلى لان ماعندهاش عقل يفهمها ان الله فضل الناس في خلقهم وشكلهم

ثامنا :
البنت تحب الولد المعتوه الشكل ...البس لبس غبي خلي البنطلون طايح شوية ..البس تشيرتات مرسوم عليها فئران وكلاب وحمير..البس كندرة حمراء و قرواطة صفراء وسورية زرقاء خليك زي المهرجين ...حاول تغير من اسلوب لبسك البس حوايجك بالمقلوب ومع ذلك لاتنسى السروال طايح خلي شعرك نازل على عيونك

تاسعا :
البنت بتحب الولد التافه ديما هدرزلها على المسرحيات و الثمثليات والاغاني الجديدة والمطرب الفولاني لبس شورت احمر والمطربة الفولانية لابسة جونة قصيرة تهبل....وخد بالك من النقطة الجاية قوللها ان صوتك مليح وانك تعرف تعزف وانهم ممكن ياخدوك في ستاراكاديمي لان موهبتك غير عادية....مع ان صوتك زي الخروف

عاشرا :
البنت تحب الولد اللي يحب غيرها ..عمرك سمعت ببنت تحب واحد يحبها..البنت تحب تاخد الشى الذي تريده....احسن شئ طنشها..ماتعدلش عليها...خليه تحس انها مش بني ادمة...واهم حاجة صاحب غيرها حتى خمسة ثانيات ...رد بالك لاتكون هي الوحيدة في حياتك..مش لاقي بنت ثانية اتصرف دير حل لروحك...صاحب أي شغاله ولا بياعه خضرة انشاءالله حتى شحاتة ...المهم لاتكون هي الوحيدة...نوع التنويع كويس

انا اوعدك ياغالي لو نفدت كل هذه النصائح حرفيا حتلغبط نص بنات ليبيا كان مش الكل

هناك 4 تعليقات :

  1. هههههههههههههههههههههههههههههه
    شكرا عالنصيحة واني نقول علاش مابتش تشد

    ردحذف
  2. إلا كل البنات بيهجون

    ردحذف
  3. ههههههههههههههههههه لا احسن قل خلك حيوان وتحبك البنت

    ردحذف
  4. ني منووووووور بي الهلبه ههههههههههههه

    ردحذف

بسم الله الرحمن الرحيم ( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )