خزعبلات فيسبوكية

دعما للهجة الليببية والجو هذا اليوم بنكتب بالفلاقي، الموضوع انتشر على الفيسبوك الايام الاخيرة وفعليا كل فترة معينه يرجع يطلع يعني حاجة موسمية، كمشة صفحات تطلعلك بمنشور جو الفيسبوك في يوم كذا او المدة الجاية حيقوم بحدف الغير متفاعلين معانا، او بيسكر الصفحات اللي مافيهاش مشاركات، او الجو الفايح التاني نتعرضو للعديد من البلاغات يرجى الاعجاب حتى لا تقفل الصفحة، كمشة امثلة:

(1)
إدارة الفيس بوك بدأت تستخدم سياسة جديدة و هي حذف الأشخاص المعجبين و الغير متفاعلين مع منشورات الصفحة و إلى الآن تم حذف حوالي 455 معجب من الصفحة من قبل إدارة الفيس بوك ، لذلك يطلب من كل المعجبين الإعجاب و التعليق و مشاركة هذا المنشور و كل المناشير العامة حتي لا يتم حذفك من الصفحة ، و شكراً .
 (2)

(3)
بالله يا شباب نبو اكتر عدد من اللايكات والتعليقات والمشاركات لان الصفحة حاليا تتعرض لهجوم من البلاغات وغرضهم انهم يسكروا الصفحة ...هدوا هما الحساد اللي نحكي عليهم ..
بالله يا شباب قيموها

المهم يا شباب كل اللي صاير فوق والأمثلة التانية هلبا راهو مافيش منها الدوة، دفنقي زايد كله ومجرد مساسية اعجاب ونشر للصفحة بشكل من الاشكال وخلاص، الفيسبوك مش من سياسته حدف الاعجابات، دارها مرة او مرتين قبل هكي بس، اذا كان هو اصلا يبيع فيهم الفيسبوك، وطريقة بيعانه للاعجاب، طريقة غريبة عجيبة، تقدر تشوف الفيديو التالي يشرح الموضوع، ما عنديش خلوق نعاود نكتب المشروح من جديد:



لكن السؤال توه شن مكسب الصفحات في حكاية الشير واللايكات؟

ببساطة الموضوع طريقة عرض الفيسبوك واليته لتطليع المواضيع للمستخدمين، لزيادة الشرح ولتبيسيط الفكرة مش معنى انك كتبت حاجة على صفحتك انها حتطلع لكل صحابك ، الفيسبوك شن يدير؟ يطلعها لبعض الناس بحسبة معينة وتكلكيشة يدير فيها اللي يبي يتفقعص يقول "القوريثم"، المهم لو حصل الموضوع شير او تعليق او لايك يزيد يطلعها لغير المجموعه هذكاي ... وهكذا، اللي يبي معلومات اكثر اهو يتبع الفيديو الجاي: 



 فالخلاصة فكونا من جو اللايكات والشير للمواضيع اللي عبتلي الصفحة الرئيسية عندي، راهو الصفحات مش حتتسكر لو اعطيتها جبل لايكات لو عليها بلاغات، الحكاية مش سالب وموجب، والحسنات يذهبن السيئات، راهو حدف اي صفحة يتم بقواعد وشروط، يعني يا اما انت منتهك وحده من قواعد الفيسبوك باش يسكرولك الصفحة زي مثلا تبيع في حشيش، سلاح، تحرض على الجريمة، اي شي من هذا القبيل و اللي يبي اكثر عليه الاطلاع على قوانين الفيسبوك، ولو عندك عدد سكان العالم لايكات مش حتقعد الصفحة.

وبس خلاص - بصوت شعبان عبد الرحيم

هناك تعليقان (2) :

  1. تب الحق مورقلها بس عجبتني نبي زياده اعدابات لصفحاتي

    ردحذف
  2. الخلاصة الليبين يكدبوا كدبة و يصدقوها

    ردحذف

بسم الله الرحمن الرحيم ( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )