قانون رقم 182 سواقة في ليبيا

في حالة تلاقي سياريتين اتجاههم معاكس لبعضهما (يعني خنفورة كل وحده منهم مواجهة للتانية)، في زنقة ضيقة مافيهاش منافذ فرعية لا زنق لا فراغات لا اي شي للمناورة، بمعنى اصبح التحرك للامام للسيارتين امر مستحيل، جاء القانون العرفي بحل للمشكلة ونظم العملية:
  1. قانون نصف المسافة: اللي قطع نصف المسافة او اكثر ليه اولوية الطريق، يعني يجب على الاخر الرجوع للخلف (لكن مشكلته ان مش الكل يلتزم بيه).
  2. قانون اللي جماعته اكثر: هذا قانون حاسم يمارس فيه الضغط الخارجي، اللي جاي في الطريق ووراه سيارات اكثر من الطرف التاني يعتبر رابح المباراة وعلى الطرف الاقل عددًا الرجوع للخلف. 
  3. افضلية صاحب الأرض: لو نصيبك الاسود جابك في طريق واحد من سكان المنطقة و الشارع شارعه نصيحة انسحب تكتيكيا احفظ لماء وجهك واسلم لحياتك وصحتك، وما تاخدش النخوه و تقول انا نلعب خارج ارضي والقول بقولين.
  4. حق الفيتو : رغم ان القوانين اللي فاتو كافيات انهم يحلو اي مشكلة باعتماد المسافة والكم، لكن يقعد في حق الفيتو، الطرف اللي ينزل بسلاح هو الطرف الرابح، وحينشد شخص ما يقول ماذا لو نزل الطرف التاني برضو بسلاح؟ الاجابة حتكون يا خونا هذا معناها تمشي تفتح الفيسبوك وتقرا اخبار الجبهة الجديدة اللي انفتحت.

مع تحيات قسم السلامة المرورية زنقتنا
 
نسخه للارشيف
نسخه لقسم العلاقات العامة
نسخه للضياع

ليست هناك تعليقات:

إرسال تعليق

بسم الله الرحمن الرحيم ( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )